Yanan ağacın kölgəsi…
Göz yaşlarımızla söndürməyə çalışdığımız yanğınlar
Türkiyəni bürüyən yanğının tüstüsü Moskvadan belə görünür. Ölkənin bir çox bölgəsində baş verən (qəsdən və ya təbii) 85 meşə yanğınında onlarla insan və yüzlərlə heyvan itkisi var. Məmləkətin fauna və florasına dəyən itkinin miqdarı ölçüyəgəlməzdir.
Bir gecənin içərisində insanından heyvanına evsiz-ocaqsız, meşəsiz-talasız, tarlasız qaldılar. Ürək dağlayan hayqırtıları, fəryadları həyəcansız, göz yaşlarını tutaraq dinləmək, izləmək olmur.
Yanğın bölgəsində həyat qurtama çalışmaları, insanların insanı, təbiəti xilas üçün haraya yetişmələri… Bütün bunlar qardaş Türkiyənin istirahət zonalarına yaxın yerlərində baş verir. Üç gündən artıqdır həm də…
Bir ağac onlarca insanı oksigenlə təmin etmək deməkdir. Minlərcə quş, böcək təbiətdə çiçəklənmə mayalanma prosesinin təkanvericisidir.
Bir ağac bir kölgə, bir ümiddir!
Bir ev, başın üstündə çatı, doğmaları başına toplayan ocaq, isti yuva və yaşadığn xoş xatirələrin ünvanıdır. Uzun illərin zəhməti ilə başa gələn ümiddir. İndi o ümidlər atəşlənib, alovlanıb cayır-cayır yanır. Yanğın bir qığılcımla başlar, amma alovlanması bütün eli yaxar-yandırar. Türkiyənin çoxsaylı regionlarında- İstanbuldan ta Alanya, Antalya, Mersin, Diyarbakır, Bodrum, Muğla, Kocaeli, Kahramanmaraş… və sair yerlərinə kimi uzanan alov dilimləri sözün müstəqim anlamında ürəkləri dağlayır.
Təbiətdən yol alıb ürəkləri də yandıran bu yanğıya biz də yanırıq. Tanrının yaratdığı, insan əlinin gözəlləşdirdiyi, mükəmmələşdirdiyinin küllərinin “başına kül olub” tökülənlərin yanındayıq. Bu anlamda sözlərlə-mənəvi dəstəklə yanında olduqlarmıza bir də hər cür yardımla yanlarında olduğumuzu hiss etdirmək adına….
Bu yanğını söndürəcək damlalardan oluşan bir qurtum su toplanar sel olar, yanğını dindirər.
Yanğının ürəklərdə açdığı yanğıyı dindirmək adına… Türkiyə, yanındayıq-demək istəyirəm! Türkiyə yanındayam! Yanğınsöndürən, təcili yardım maşınlarının həyəcan siqnalının səsi olaq.
Təbiətin fəlakəti insanlığın fəlakətidir… Bu insanlığı xilas etmə, içindəki insanlığı oyatma adına bir fürsətdir də bəlkə. İnsanı insanlıq xilas edər. Onun yolu da içinizdəki, içimizdəki mərhəmətdən keçir. Mərhəmətli olmaq məlhəm olmaqdır!
Türkiyə üçün yanıb yaxılanlardan biri- Tünzalə Vəliqızı
