DEYİNGƏN – MÖMİNƏ SORDUM: KEY ŞEYX?!
Əcəba vicdanın indiyə qədər nə olduğunu dərk etməməyi şərablamı isbat eləmək gərəkirmiş? And içirəm ki, nə qədər ateizm mikrobu ilə zəhərlənsəm də, islamın haram buyurduğu içkilərlə günaha girmiş olsam da, televiziyaların gözümə soxduğu naməhrəmlərə baxmaq zorunda qalsam da, Həcc ziyarətinə getməyib, oruc tutmasam da, məzlumların harayına yetərincə çatmasam da ana vətənimdə gözlər önünə sərilən sərxoş din lövhələrinin qarşısında açıq alınla deyə bilərəm: mən sizdən çox dindaram!
Nə gördük dinmədik, düzələr deyib onların ayıbına biz kor olduq, amma yetər artıq, vallah da yetər, billah da yetər! Tamah da bu qədər olmaz, günah da bu qədər olmaz! Ayrıca götürülmüş bir ölkədə, Yaradanın heç nəyi əsirgəmədiyi bir cənnətməkanda mənəviyyata, insanlığa, haqqa, ədalətə təcavüz də bu qədər olmaz! Biz beləmi hürriyyət istəmişdik? Buna görəmi istiqlala qovuşduq? Bu qədərmi nifrət var bizim hiylədən və tamahdan yoğrulmuş canımızda həmvətənlərə qarşı, əli dövlət xəzinəsinə çatmayanlara qarşı? Bu qədərmi gözümüzü tutub tamahımız ki, oğullarını vətən yolunda qurban vermiş anaları intihara sürükləyib rahat yatırıq?
Ey bu sətirlərin hədəfi olan “altın və qadın düşgünü bicarə həriflər”, sizlərin bu cızmaqaranı oxumayacağınıza adım kimi əminəm. Bir-iki şikəst casusunuz var, oxuyacaqlar, şəhvətdən vaxt tapsalar məruzə edəcəklər, amma həqiqəti yox, irəlidə ona vəd etdiyiniz yalın çox olması üçün ağlının gücü çatanı deyəcəklər sizə. Ağlaşmanın, sizi insanlığa çağırmağın faydası yoxdur, fəqət göz görə-görə bu sürətlə uçuruma getmənin havasından, cəhənnəmin yaxınlaşan istisindən qımıldanmamağınız adamı bağırmağa məcbur edir.
Ad çəkmirəm, çünki hamı şeyxlər şeyxini də bilir, akademiklər akademikini də. Bir də təkcə bunlar olsa nə vardı ki? Hansı məmurun adı çəkilir, “altından” azı iki milyard manat, dollar pul çıxır. Qaçqın, köçkün ehtiyaclarını qarşılamaq təəhhüdü olan birinin iki milyard dövlət vəsaitini oğurlaması kimə şərəf gətirər ki?
Azərbaycanın illik büdcəsi, yanılmıramsa, 24 milyard dollardır. Şeyxlər, akademiklər bir az dincəlsin, qısa bir haşiyə çıxım. Ən sıravi komitə sədrinin “qara gün üçün xərcləri” iki milyardla ölçülürsə, müavinləri, köməkçiləri bir yana, təkcə birinci şəxs kimi 20 nazirlik və komitə sədri varsa, 125 millət vəkili Milli Məclisdə tər tökürsə, 63 rayonun başında o qədər icra başçısı varsa və bunların hamısı xalqın rifahı üçün yox, ona öz şadlıq saraylarında satdığı şərabın şüşəsindəki etiket üçün can qoyursa, deməli, orta hesabla 200-220 şəxsin hər biri (Forbs və digər statistlərin gözündən iraq) ən az iki milyard sərvətin saxlanması dərdi ilə yaşayır.
Gündə gələn intihar xəbərləri dövlətin müqəddəratını həll etməli olan bu insanların gözünə-qulağına dəymirmi görən? Döğrudanmı intihar yeganə yoldur bu rəzaləti görməmək üçün? Əsla. Azərbaycan xalqı bu qədər naümid ola bilməz.
Cəfər Sadiq,
17 noyabr 2018 ci il.
Moskva