Almaniyanın keçmiş prezidenti İslamı “Almaniyanın ayrılmaz hissəsi” adlandırıb

TASS-ın məlumatına görə, 2010-2012-ci illərdə dövlət başçısı vəzifəsini tutmuş Almaniyanın keçmiş prezidenti Kristian Vulf İslamın müasir Almaniyanın ayrılmaz hissəsi olduğunu bir daha vurğulayıb.

Bremendə Almaniyanın Birlik Günü şənliklərindən bir həftə əvvəl Köln şəhərində yerləşən “Domradio” radiostansiyasına müsahibə verən Vulf prezidentliyi dövründə səsləndirdiyi mövqeyi təsdiqləyib. On altı il əvvəl siyasətçi “İslam artıq Almaniyanın bir hissəsinə çevrilib” demişdi. Keçmiş prezident həmin sözləri bu gün də təkrarlayacağını bildirib.

“Bu gün də eyni sözləri deyərdim”, – deyə Vulf bəyan edib.

O qeyd edib ki, Almaniyada 6 milyondan çox müsəlman yaşayır və onların bir çoxu artıq vətəndaşlıq əldə edib. Vulfun sözlərinə görə, müsəlmanların öz məscidləri, imamları və dini təhsil dərsləri mövcuddur.