Putin Təhlükəsizlik Şurasının geniş iclasını çağırıb
Prezidentin mətbuat katibi Peskov Putinin fevralın 21-də Təhlükəsizlik Şurasının növbədənkənar iclasını keçirəcəyini deyib.
Rusiya prezidenti Vladimir Putin fevralın 21-də Təhlükəsizlik Şurasının növbədənkənar iclasını keçirəcək. “İnterfaks” xəbər verir ki, bu barədə Rusiya Federasiyası Prezidentinin mətbuat katibi Dmitri Peskov növbəti brifinq zamanı bildirib.
“Bu, böyük Təhlükəsizlik Şurasıdır”- deyə o, qeyd edib.
Peskov həmçinin bildirib ki, Putinin bu günə bir neçə beynəlxalq telefon danışığı planlaşdırılıb. Kreml sözçüsü Təhlükəsizlik Şurasının fövqəladə iclasının və qarşıdan gələn danışıqların mövzusunu açıqlamayıb.
Fevralın 18-də özünü müstəqil adlandıran DNR və LNR rəhbərliyi əsasən qadınlar, uşaqlar və qocalar olmaqla respublika sakinlərinin müvəqqəti evakuasiya olunacağını elan etdilər. Ukraynadan gözlənilən hərbi hücum təhlükəsi ilə əlaqədar əhalinin Rostov vilayətinə təxliyəsi başlayıb.
Bundan əvvəl Putin fransalı həmkarı Emmanuel Makronla söhbətində demişdi ki, Ukraynaya NATO silahlarının göndərilməsi Kiyevi Donbasdakı vəziyyəti güc yolu ilə həll etməyə təhrik edir.
Yenises.ru